تبكي على روحها و لاّعليهم هوما ؟

تروّح  لدارها الباردة المهجورة .

 تجري باش تنّحي الصباط اللي لبس ساقيها اكثر من 14 ساعة  , توكّل القطاطس ,تسخّن صحن المقرونة اللي شراتو البارح و ماكلاتوش على ما الشاهية مقصوصة مفقودة 

تروّح مهمومة مخنوقة مغمومة ,تحبّ تطرشق تصيح و تعيّط و تسيّب الدموع المحبوسة 

مش عارفة تبكي على روحها و لاّ عليهم هوما 

تبكي على روحها اللي ضيعتها على حلمة ولاّت كابوس و  على عشقة سرقوها الزنوس

 , تبكي على فاتورة الضو اللي ما خلصتش و لاّعلى كلامات الناس اللي ما وقفتش 

تبكي على فلان و لاّعلاّن على اللّي قالها نحبك و خان و تمسكن حتى تمكّن وولّى فرعون 

ولاّ على اللّي من خيالو غار و بعد ما وعدها بالحب و العشق و دار وبرشة صغار هاجر و فارق و طلع غدّار 

ولاّعالصاحبة اللّي دخلت للدار و غدرت و كذبت 

تبكي على بدنها المريض  ولاّعلى اعصابها اللي تعبت ؟ 

تبكي على روحها و لاّعليهم هوما 

علّي لقّاو صدوراتهم للرصاص و سمّاوهم ابطال و بعد ما شدّوا الكراسي ولاّو يراو فيهم سرّاق و اشرار 

ولاّعلى  اللي يدو و ساقو مقصوصة و لا من خزرلو و لاّ اهتم بأمرو 

علّي فقد عينيه في سليانة ولاّ اللي مات بالرصاص في الذهيبة 

تبكي علّي غرقو في بوسالم ولاّ الي  كلاهم البرد في فرنانة ؟

تبكي على السبولة اللي نهبوها و لاّ عالبلاد اللي باعوها 

تبكي على رانية اللي غدروها و لاّعلى مروى و شهيرة اللي في قابس جوّعوهم ؟

تبكي عالجندي المغدور ولاّ الامني اللي ذبحوه مالوريد للوريد ؟ 

تبكي على  بالعيد و البراهمي و نقض و بالمفتي ولاّ  على لخرين الميتين بالحياة  ساكتين مبهمين متملحين ؟ 

تبكي على سيدي بوزيد و لاّتالة و القصرين ؟ 

و لاّزعمة على صغيرات المسار  اللي طردوهم مالدار اللي بناوها حجرة حجرة 

تبكي على الجنة اللي شعّلو فيها النار 

ولاّعلى اللي غدروها كبار و صغار 

تبكي على اللي غرق في البحر و لاّعلى اللي كذبو عليه و بعثوه لسوريا باش ينفجر ؟ 

تبكي على اللي يشهق ما يلحق و لاّاللي ظلم في حبس مرمي ؟ 

قدّاش باش تبكي و قدّاش باش تحكي ؟ 

برشة وجيعة و برشة ألم