تخربيش

عاد في حديث التخريب و التكسيرملّي صغيرة بابا يخدم في كلّ ماهو تجهيز و اسكان و الفازات هاذوكم عاد مغروم و محراث متاع خدمة و كنت مستانسة و نعرف انّو كي يصير فيضان و لاّحادث كبير و لاّغيرو ينجّم مثلا يبات في الخدمة و في اخر الجمعة المحواسات مش وتلة و مناطق سياحية هوكة شوية مناطق طبيعية على شوية اثار على شوية مناطق نائية و شوية كياسات قاعدة تتخدم و في الاثناء زادة حديث على شوية تاريخ و جغرافيا و هندسة معمارية و علم اثار و بنية تحتية المهم من خلال هذا كلّ تعلّمت نحبّ قطعة الارض اللّي عايشين فوقها و اللّي بدات تضياق علينا حسب ما شفت وولّيت نحسّ كلّ شبر منها حاجة منّي و بالطبيعة كي نحسّو اللّي حاجة متاعنا نعملو كلّشي باش نستحفظو عليها . 

عاد و احنا صغار كانوا صحابي يفدّو منّي خاطر في حومتي في الزهراء كان عنّا المسبح ( اللّي توة قريب يحضر بعد الاشغال و التجديد مع تاخير طويل و عريض) اللّي هو انجاز من عهد الفرنسيس و يحكيولي اللّي هو كان حاجة هايلة برشة قبل ما يهجم البحر عالزهراء في نهار من نهارات و يكسّر المسبح و الديار . عاد بلدية الزهراء كلّ مرّة تجي تصلحو زعمة زعمة و تحطّ فيه ملايين كان مش مليارات و كلّ مرّة تطلع فيه مشكلة . و احنا ولّينا نمشيو نلعبو غادي في الشايح . عاد صحابي كانو يتنقرسو منّي خاطر مالحاجات اللي كانو يعملوها هي تقليع الزليز متاع البيسين هكاكة عالجوّ و كنت انا نبدا نصيح و مش عاجبني و نبدا نستعرض عليهم في دروس ضرورة المحافظة عالاملاك العامة و البنية التحتية خاطرها ملكنا الكل ّو عاطية ما عندي و هوما عامليني تكركيرة ... و يقولولي مافيبالناش بوك كرزة باش تملك البيسين ,
ما تستغربوش انّو اليوم انسان ما يرحمش البلاد و يبجا يكسّ خاطر عمرنا ما كبرنا بعقلية الممتلكات العامّة متاعنا ملك الناس الكلّ و لازم نستحفظو عليها و كبرنا بعقلية رزق البايليك و اخطى راسي و اضرب و المهمّ عدّي راسك و ماعليكش ...

نحبّ نسال العباد اللّي جايبتها خاطيها الاعتداء على ممتلكات الدولة و كذا و كذا : قدّاش من مرّة حلّيت شبّاك كرهبتك و طيّشت زبلتك ؟ قداش من مرّة حلّيت سروالك و شرشرتها في الشارع ؟ قدّاش من مرّة بزقت في الشارع ؟ قدّاش من مرّة لوّحت زبلة البني متاعك في بلايص مش مهيّئة للغرض ؟ قدّاش من طاق بنيتو بلاش رخصة , قدّاش من طرف مالشارع ماخذو من غير وجه حقّ باش تحط عليه كراسي قهوتك و لا تيندة لكرهبتك ؟ 

وقيّت باش نفيقو على رواحنا و نفهمو الّي تونس متاعنا الكلّ و اللّي لازم نحسبو كلّ طرف منها ملكنا الخاص و نتصّرفو فيه كيما نتصرّفو في ديارنا و نستحفظو عليه . ما تستغربوش اليوم كي صغار يخرجو يكسّرو اسالوا رواحكم علاش و كيفاش و حتى كان فمة شكون يدفعلهم اسالوا رواحكم علاش قبلوا باش يخرّبوا بلادهم بارخص الاسوام .
وقيّت باش نتحمّلو مسؤولياتنا الناس الكلّ و نشوفو حقيقتنا قدّاش خايبة .