تطيير ملام

عندي مدة ما كتبتش ما عنديش كيف بالكتيبة خاطر أنا نمّن اللي الكتيبة كيف ماهيش بالسيف. وزيد كثرت المشاكل الشخصية عندي أكثر من جمعتين نحاول ناخو بطاقة تعريف و النافع يا حلبة شي وزيد كل ما نمشي كيما قالي واحد في تعليق نهمل و نفسد في قهاوي الحبيب بورقيبة نتعب و نفدّ و ساعات نوصل لدرجة الانهيار ما بين العدد الماهول للناس اللي تطلب و عوج الناس اللي تسوق و اللي لا عاد همها في ضو و لا همها في غيرها كي تاقف في دوزيام بوزيسبون و تعطّل الناس الكل و هذا كل و البوليسية تتفرّج و كان تكلّمهم يا ويحك يقلّك ماكم عملتو ثورة تحمّلوا مسؤولياتكم كاملة  زعام كان في اللي يحكيي على البنان هذاكة ينجمو يوّقفوه و يمّسدولو عظيماتو .و قلبي يوجعني برشة كي نرى هاك الصغيرات اللي يبيعوا في المشموم اللي يوجعني في الحكاية زيادة على حرمانهم مالقراية كي ندادهم هو الطريقة اللي معلمينهالهم باش يبيعوا بيها هاو بوس هاو تعنيق معناها صغارنا نستغلّوهم و نزيدو مالفوق نعّلموهم التلحيس و الذلّ . تي يا رسول الله علاش قامت الثورة في البلاد تي على حاجة اسمها كرامة و احنا في عوض نربيو صغارنا على الكرامة فماش ما يجي جيل يصلح بعد مدة طويلة لا نعلّمو فيهم في التلحيس لا و يزيد يطلعلي الدم اكثر كي نرى مواطن صالح لا نحب نقول طالح يعدي في وقتو بهاك الصغيرات يعدّيلهم اكثر من ساعتين و هو يسال  في اسئلة بايخة و تقول باش يشري و يسيب عليهم بلادتو الكل حاشاكم و حاشى قدركم و بعد يبعثهم  

الليلة شفت مشهد وجعني ياسر وليد صغير راقد على كردونة في الشارع عمرو ما يفوتش ال12 سنة و الوجيعة كانت مضاعفة خاطر تفكّرت اللقاء التلفزي اللي واجهت فيه سيءة الذكر و الوجه العقرب المشومة سيدة العقربي  ليلتها انا نقّلها ايجا نهزّك لمحطة برشلونة شوف الصغيرات اللي يباتو في الشارع و هي تقلّي يزي بلا كذب ما عناش ناس تبات في الشارع و بن علي بونا الحنين مستحيل يخلي حد يبات في الشارع  و الوجيعة كانت مضاعفة خاطر بعد ما صارت الحاجة اللي تسمات ثورة بتسعة شهور الحالة هي هي حد منا مخمم في الناس اللي تعاني و الناس المهمشة اللي بدات الثور ة هاذي و ما غير ما تخردولي حكاية حكزمة مؤقتة و البيعات هذيكة خاطر الحكومة المؤقتة عطات لروحها حق ماخذة قروض  عالمية اما ما نتجمش تحل مشاكل الناس الزوالية 

الحاصل حليت البلوغ و نيّتي باش نكتب على اللي صارلي في مركز البوليسية الايامات هاذي ياخي نلقى روحي نكتب  على الطفولة المضطهدة  لذا غدوة تو نخّرف على البوليسية