الحكاية هي هي

   هذا كتبتو نهار عيد ميلادي أمّا نهارتها الكونكسيون قصّت و حلفت بالايمان السبعة ما ترجعش  منعرفش صدفة أو بفعل فاعل خلّيتو قلت نزيد نحسّنو بعد قلت أخطاني خلّيه كيما هو

  

سبعة و عشرين سنة و هي لهنا  ,سبعة و عشرين سنة و هي تحلم بالهنا .تقوم الصباح تحلّ تونس ضبعة و تقرى الجرايد الصفرة

الأخبار هي هي

تحديات مرفوعة , رعاية موصولة و تغيير مضيّع الثنية. تحلّ القوقل و الفايسبوك و بالطبيعة كان تحلّو و ما بدلولهمش الطريق 

الأخبار هي هي

إضراب جوع,عريضة, عبد مقموع, عبد محبوس, عبد مجوّع , عبد ملوّع, عبد معفوس

تخرج للشارع تمشي شوية , الوجوه هي هي, الوجيعة هي و الخنقة هي هي

عبد مرهون , عبد مسلوب, عبد مكبّل ,عبد مربوط : كمبيالاتة قروضات, عروسات و طلاقات و سيارات شعبية

تطلع في التران  الحكايات هي هي , التكشبيرة هي هي , القحرة هي هي و التنهيدة هي هي 

تمشي للجامعة المشاكل هي هي تدخل للسبيطار و لاّ إدارة الصفوف هي هي و التشكيات هي هي

سبعة و عشرين سنة 

وهي تتوّجع

وهي تتنهّد

وهي تصيح

وهي تعيّط

الحكاية هي هي

حدّ ما يسمع

حدّ ما يفهم

و حد مايردّ

الحكاية هي هي