قدام الداخلية

    الرجاء من الناس الرقيقة المشاعرالرهيفة الاحاسيس  عدم قراءة هذه التدوينة فهي تحتوي على عبارات نابية و الفاظ سوقية و منافية للحياء و من انذر فقد اعذر

  امس قررت باش نستجيب للدعوة اللي عملتها الاستاذة ليلى من اجل وقفة احتجاجية صامتة قدّام وزارة الداخلية .الحاصل المطلب كان هو معرفة الحقيقة فيما يخص الشاب اسامة العاشوري و اللي يقول انو تم اغتصابو من قبل اعوان الامن اثناء ايقافه , احنا حبينا نطالبو الوزارة المعنية بكشف الحقيقة للراي العام و بالراي العام نقصد الناس اللي اهتمت بالموضوع و حسّت على رجال تونس و نساها  و  يقلّقها انّو راجل و لاّ مرا تستفعل فيهم الناس اللي مالمفروض  تحميهم, لكن هذا ما يعنيش انا كنا نساندو في اسامة بصفة عمياء بل طالبنا انو في حالة اثبات انو السيد يكذب لازمو بتعدّى على المحكمة مش يقعد يدور  في الشارع حرا طليقا. مشينا 3 عباد ليلى و حلمي و انا. ليلى طلبت مني باش نسكّرلها فمها بالسكوتش و نربطلها ايديها و الغاية بالطبيعة هو اثبات انو في حالة اعتداء عليها يبان للناس اني مكبلة و فمها مسكّر و ما قلّقت حد بعد اللي البوليسية اللي ما نعرفوش بوليسية و لاّ لا  الحاصل هاك الجماعة المنّقبين اللي  قالو اللي هوما  نفس مومنة و خاطيهم و  يدافعوا على رواحهم    وقت اللي يتم الاعتداء عليهم من طرف المتظاهرين  الوحوش واللي هوما عمرهم ما يبادرو بالعنف

الحاصل احنا مازال بحذا الافريكا وواحد سيفيل جبد حلمي و في بالو باش يهزو جبدت حلمي و قتلو امشي ما تحكي مع حد و قحرت للسيد مع اني نعرف اللي طولي و قحرتي يتحقرو و ما ينجّم ياخو عليهم حدّ و كمّلنا الطريق للداخلية. الحاصل بدا العدد متاع الغربان الكحل يكبر و بدات الكراهب رباعية الدفع تتلّم المهم كي و صلنا لمكان الوقفة جبدنا لافتاتنا ووقفنا . و كل واحد من هاك الغربان يرمي في كلمة : اعملو هاالزوز التصاور و روحو و شكونكم و شتحبوا و كل ما مواطن ياقف يحب يشوف يقولولو ايا تعدى بلغة خايبة   . و الناس ترعش و تخاف و تكمّل الطريق المهم حسيت اللي هاك الطرف خوف مالبوليس اللي تنّحى رجع بقوّة فمة كان مرا هي و بنتها قد ما صاحو عليها قد ما بعثولها افراد مالميليشيا ما حبّتش تمشي و بعد التحق بينا شاب متعدي و كي فسرلو حلمي الحكاية جا معانا و هز لافتة ووقف و بدا الاستفزاز بطالة و معندكم متعملو و هاك الريق هاذاكة الكل و جاء السيد  الاول اللي حب يقبّض على حلمي و بدا يسال اش تخدموا و هاك الحكايات. هذا كلّو عادي و من تحصيل الحاصل و يصير في احسن العايلات.  بعد التحق بينا شخص اخرهو  خوشهيد المدونين التوانسة , المشاكل بدات و قتلي بدات ناس اخرى تجي في الاول لصقو فينا من تالي و بدات لغة : كان ما تمشيوش من هنا اماتكم باش تتناك و فمة سكاكن في اللعبة . الحاصل في الاول جابولنا جماعة الكلاريج كعبتين و كعبة اما كي لقاونا عزوزة ما يهمها قرص بدات الحشود و الوفود تتوافد مالشوارع الكل. الناس هاذم نسا و رجال من  طبقات اجتماعية مختلفة يظهرلي الحاجة الوحيدة اللي تجمعهم هي الانحطاط الاخلاقي و الولاء للفساد و المفسدين و بالطبيعة يقعد هذا رايي الشخصي اللي ما يلزمني كان انا . بدا الصياح و العياط و لغة  الاقتصاد و ايجاو عسّو انتوما كي نتبراكو و احنا نحبو البوليسية و يا مفسدين و تحبو الجزيرة تجي تصوركم و حاجات سخيفة من نوع اللي وقت انا حطيت السكوتش علة فم واحد مالاولاد خاطر بدا يفد و باش يعمل عركة قالولو ماكش راجل مرا تشكرلم في فمك و انا  منجمتش نشد روحي اكثر قدمت في اتجاه الداخلية خاصة و قتلي جا واجد يعيط انا مواطن و نخدم حوات و هاي كارتي و بالطبيعة ما وراش كارتو و نخدم هنا و يوري فينا في الكلاريدج و يقول نسكن و نخدم غادي . حتى كذبهم و تبلعيطهم سخيف  و وقفت شادة لافتي و قتها جاوني حضبة واحد ضربني و قطعلي اللافتة و قتها هسترت صدقوني ما نتذطّرش شنوة قلت بخلاف الكلمتين اللي فكرني فيهم حلمي من نوع اضربو يا كلاب اضربو الميليشيا مازالت موجودة و ما تبدل شي الحاصل  ما نتذكرش طيفاه نلقى رو حي بين يدين حلمي و قتها ارتحت شوية  و احنا مع بعضنا الكل و هما يقّطعو في الاوراق و جاو زوز نسا منهم عملولنا طريّح و حدة تحكي  بلغة العكري كهو و لخرى تمجّد في البوليس المهم البوليسية هما اللي بعدوهم يعد ما تهسترت انا و بعد ما ليلى اللي قعدت ساكتة نحات اللي على فمها و قاتلهم للبوليسية فاش قلقتكم سمعتوش كلمة عيب ؟ 

          حشموا على رواحهم و بعدوهم المهم انا بداولي في لغة يا خامجة يا فاسدة يا قحبة يا متاع البلالط يا قعرة يا بنت دوار هيشر و لاّ التضامن . و انا نضحك خاطر يشرّفني اني نكون بنت اي شبر من تراب البلاد هاذي  و لغة برّى شوف راجل قالقة خاطر معندكش راجل  ما تفلّش فيّا . الحاصل كملّنا سويعتنا مالخمسة للستة و هو وقت خارج اوقات العمل و روحنا بعد ما لمّينا الاوراق اللي قطّعوهم وطنيو البلاد البلاد هاذي 

خلاصتي هي اللي فمة اطراف مازالت تستعمل في العنف و يلتجئ ليها البوليس باش ما يتدخّلش هو و ما يتدخّل كان كي تاكل بعضها و لازم استعمال القنابل المسيلة للدموع و لا الرصاص  و انت و خطورة الموقف  معاملة البوليس للمواطن ما تبدلتش