vendredi 4 janvier 2013

زعمة إصافي الدهر يا مزيانة ... مقال في جريدة ضد السلطة بتاريخ 5 جانفي 2013


حاجة صعيبة باش واحد يكتب على الحاجات اللي قعد يتذكّرهم مالفترة اللّي تعدّات .قدّاش باش نكتب و شنوّة  باش نقول؟ زعمة باش نحكي على فرحتي بحكاية التناصف في الانتخابات و الفرحة اللي حسّيت بيها و قتلّي الهيأة هاك اللّي اسمها طويل و عمري لا حفظتو قرّرت المبدأ  هذا  و لاّ باش نحكي على الهمّ و الغمّ اللّي ضربني وقتلّي شفت تصويرة اللي مالمفروض تكون وزيرة المراة و هي في قمّة السعادة و "تبوزي"بجنب صبّاط ليلى بن علي و زدت شفتها في فيديو قصيرة هي ووحدة  من النائبات اللي صادتنا و المقصود بالنائبة هنا هو المصيبة الزرقة اللي كي تهبط على عبد طيّحو بال"كاوو"    و ما عادش تقوملو قايمة مش العباد اللي مالمفروض يمثلونا في المجلس التاسيسي.المرا في الفيديو تفرفط و تنقّز و تقول جيعان و طاح في قصعة
زعمة باش نخلّي في مخّي تصويرة هاك النساء اللي عملوا مجهودهم وقت الحملة الانتخابية و داروا تونس الكلّ بمعاملها و مدارسها و سبيطارتها و اسواقها و سانياتها باش يوّعيو الناس  بحالة البلاد و يفّهموهم واجباتهم و حقوقهم و لاّ تصويرة ساق هاك النايبة اللّي نسات اللي فمّة ناس عطاتها ثيقتها و مالمفروض تمثّلهم احسن تمثيل اما هي نسات روحها و نحّات شلاكتها و مدّت ساقيها تقول في عشوية  ولاّ محفل و نسات اللّي هي في مجلس تاسيسي تشارك في تقرير مصير بلاد ولاّ لخرى الّي نقّزت توّري فينا في حنّتها و تحكيلنا على عرسها.

زعمة  التاريخ شكون باش يتذكّر النساء و الرجال  اللّي خرجوا يتظاهروا وقتلّي 3 بوليسية اغتصبوا طفلة و الكاذب الرسمي للجمهورية عمل مجهودو باش من ضحية يرّجعها مجرمة ولاّ "الوزيرة" اللي مشكلتها مع الجبن و اللّي غمّضت عينيها على حكاية الاغتصاب و دافعت على الزواج العرفي و نسات اللي دورها هو الدفاع على حقوق النساء وحماية العايلات . يا مدام نسيت اللي الزواج العرفي ما يعطي حتى حقّ للمرا و ينجّم يتسبّب في مشاكل اجتماعية كبيرة نتحمّلوا نتائجها لاجيال و اجيال ؟ نسيت اللي الصغار اللي يتولدوا مالعرس هذا ما عندهم حتى حقّ و لاّ وقها تاخو عليك الدور السيدة سعاد عبد الرحيم و تخرج تنظّر علينا و تقلّنا اللي الامهات العازبات يمثّلوا عار على المجتمع؟

زعمة باش نتفكّر تصويرة المرزوقي يطيّر في الكنالو و لاّ تصويرة عمّي لخضر و خالتي شهيدة  و هوما جلد على عظم من اضراب الجوع اللي عاملينو بعد ما تشدّ ولدهم بعد ما خرج مع بقيّة ولاد العمران باش يطالبوا بحقّهم في الخدمة لا حقّهم في الحياة خاطر هوما كيما اغلب اولاد و بنات الشعب التونسي جثث في حالة حياة بعد ما تسرقت احلامهم و طموحاتهم بالكرامة و الشغل ولاّ باش نتذكّر ايّوب المسعودي مساعدك  اللي حبّوا يرميوه في الحبس خاطر قال لا و مانيش باش ندخل في لعبة سرقة الاحلام  زعمة باش نتذكّر بوكي النوّار اللي رميتو للحوت ولاّ بدونات الاولاد اللي سرقتولهم الامل و دزّيتوهم للبحر و قمتوا تعملوا في عروسات جماعية باش تضمّنوا الحملة الانتخابية؟

زعمة باش نقعد   نتفكّر عصام اللّي جبدني ما بين صحابي نهار 5 اوت و  مهّدني بطريحة مع برشة من اصحابوا خاطر خرجت باش نقول لا راني ما نكمّل حدّ راني انسان و راني كيفي كيفي الراجل ولاّ عصام اللي كتب الشعر و قال لا و تخطف و تحبس و تظلم و من شهريتو تحرم  زعمة نتفكّر نتفكّر تصويرة البوليس اللّي ضربني نهار 9 افريل و عصرلي صدري و قالّي يا فاسدة يا عاهرة و لاخر اللّي لا حشمة ولا جعرة جبد بابا و ضربوا بالغدرة كي حبّ من  تحت عصاه يجبدني و من ضربو يمنّعني ولاّ نتذكّر وليد اللي قال لا للتعذيب و فيصل و علي اللّي  حلموا بالامن الجمهوري و تحييد الامن ياخي قالولهم يبطى في الهبطة  ما تقولوا هالكلام وحرموهم من ابسط حقوق الانسان

زعمة باش نتفكّر فرحتي بمبدعينا و مبدعاتنا  و فنانينا و فناناتنا  و رياضيينا و رياضياتنا و رجالنا و نسانا  و بتالّقهم في العالم الكلّ ولاّ باش نبكي على ميزانية وزارة الثقافة اللي ما خلاّو فيها شي و على رجال و نساء الثقافة اللي كلاو على مرّمتهم ما كلا الطبل نهار العيد من عند تجّار الدين و الناس المغلّقين

زعمة نفرح بالفياغرا ولاّ نبكي على الدوايات المقطوعة...زعمة نمشي نجري لمعرض الزين و نصكّ الثلاثين باش نتصوّرفي   فريب العابدين و لا نندبهم على الفلفل و الطماطم و البطاطا والحمص و اللّحم والغلّة و الايسانس و المازوط و الحوت ههه شمعناها حوت حاشاكم
زعمة نتفكّر الناس اللي جات تجري كيف عملنا خيمة و الحوايج لمينا كي الثلج هبط علينا  ولاّ نتفكّر الوزير اللي الجرحى همّل و حقّ الشهداء خذا... 

زعمة اناهي خير تصويرة التونسي متاع 2011 و هو يضحك لخوه و يسبّق فيه على روحو و يحترم في اشارات المرور و يعسّ على حومتو بقلب و ربّ ولاّ التونسي اللّي يكفّر في خوه ويسّب فيه و يشتم و التونسي اللّي نسى شمعناها قانون ولاّ لا ياقف في ضوّ و لا يعبّر لا مرا ولاّ راجل و لا صغير ولا كبير التونسي اللي ولاّ يفركس كيفاش يسرق قدمة من خبزة القاتو كيف الجماعة اللي تحكم فينا   و التونسي اللي عندو قهوة يحط كراسيه فوق التروتوار و بعد يزيد يحفتر شوية مالكياس و التونسي اللي يعطي رشوة باش يبني بلاش رخصة ولاّ ولاّ ولاّ

 
زعمة اناهو خير المقصّ متاع عمّار 404  اللي مالانترنات حرمنا ولاّ المقصّ اللّي ولاّ يرمي في الناس في الحبس على كلمة و جملة و اللّي يعيّن في البوليسية على راس الجرايد  و يجوّع في الصحافيين و يرمي مالّي التلافز في الحبس كي ما يحجّوش بمونبليزير

زعمة نتفكّر اللي بالسيدا مرّضني و في الحبس رماني و في الجبّانة سكّنّي و بالعاهرة و الفاسقة نعتني ولاّ نتفكّر اللّي جوابات الحبّ بعثولي و باقات النوّار جابولي زعمة نتفكّر اللي في عرضي ضربوني ولاّ الطلبة و الطالبات  اللي بالحبّ غرّقوني؟؟؟ 

الحاصل الحكاية ما توفاش و القايمة طويلة عامكم مبروك و ان شاء الله اللي جاي خير ملّي تعدّا و ان شاء الله يتنحّى الحقد و الكره وتعمّ  الوحدة و المحبّة و كلّ عام و انتوما حييّن بخير و ان شاء الله مشاكلنا و مشاكل الشعوب العربية و شعوب العالم تتحلّ و انشاء الله المحبوسين ظلما كلّ يتسيّبوا و كيما يقولو الحبس كذّاب و الحيّ يروّح و ما يدوم حال  ...
... 

 
 
 

Aucun commentaire:

Enregistrer un commentaire