زعمة المشكل منّي ولاّ منهم؟

زعمة المشكلة منّي و لاّ منهم ؟, نقوم الصباح نحب نقرى شوّية تدوينات ولاّ مقالات تتعدّى 404 باشي تضربني تسخطني و تخلّيني طايحة نتصكّك. ما عادش فاهمة شي ولّيت نقول بالكشي أنا ضاربتني عين و منفوسة بلوغة أخرى عندي التابعة وهنا اللّي متبّعني و متعّبني لا هو جنّ و لا هو غول تابعتي عمّار التونسي وين نمشي نلقاه يا ضاربني ياضارب صحابي و أحبابي ولاّ حتّى المعارف البعاد.
ولّيت نخمّم باش نشوف دقّازة ولاّ وقّاعة باش تحلّ عليّ كتاب ولاّ تداويني بخيط و زبيبة بعد الّي لحكاية ولاّت مستعصية لا يفهمها عقل و لا يقبلها عاقل واستفحل الداء و ما عادلو من دواء .عمّار لا مخلّي لا أخضر لا يابس يحش فيها الكلّ مالمدوّنين الشياطين اللّي يقضّو في مضاجع السلاطين للصحافيين المحترفين الّي في حلاّن العينين و توعية الجماهير طامعين. علاش غيري كي يحبّ يتفرّج في فيديو هيفاء ولاّ نانسي يكتب رابط و يتهنّى و أنا على ألف رابط و بروكسي نتعدّى؟ علاش كي نبدى حاجتي بمعلومة لازم نعدّي نهاري مهمومة و مغمومة ؟ زعمة كي نمشي لوقّاعة تلقالي حلّ و مشاكلي مع الباشي تتحلّ؟